హార్ముజ్ జలసంధి పరిధిని పెంచిన ఇరాన్

• 500 కిలోమీటర్ల మేర 'ఆపరేషనల్ జోన్'గా ప్రకటన
• అంతర్జాతీయ నౌకాయానానికి ఐఆర్జీసీ కొత్త సవాల్

టెహ్రాన్‌: ప్రపంచ చమురు రవాణాకు అత్యంత కీలకమైన హార్ముజ్ జలసంధి విషయంలో ఇరాన్ తన వ్యూహాన్ని మార్చింది. ఈ జలసంధి భౌగోళిక పరిమితులను తాము పునర్నిర్వచించామని, ఇకపై దీనిని 500 కిలోమీటర్ల మేర 'క్రియాశీల కార్యకలాపాల జోన్'  గా పరిగణిస్తామని ఇరాన్ రెవల్యూషనరీ గార్డ్ కార్ప్స్ (ఐఆర్జీసీ) సంచలన ప్రకటన చేసింది. గతంతో పోలిస్తే ఈ జలసంధి పరిధి ఇప్పుడు మరింత విస్తరించిందని, ఈ ప్రాంతంలో జరిగే ప్రతి కదలికను తాము పర్యవేక్షిస్తామని ఐఆర్జీసీ అధికారులు స్పష్టం చేశారు. ఈ నిర్ణయంతో పర్షియన్ గల్ఫ్ , ఒమన్ గల్ఫ్ మధ్య ఉన్న వ్యూహాత్మక మార్గంపై ఇరాన్ తన పట్టును మరింత బిగించినట్లయింది. ఇరాన్ తీసుకున్న ఈ నిర్ణయం అంతర్జాతీయ వాణిజ్యం , భద్రతపై తీవ్ర ప్రభావం చూపే అవకాశం ఉంది. ప్రపంచవ్యాప్త ముడిచమురులో మూడింట ఒక వంతు ఈ మార్గం గుండానే రవాణా అవుతుండటంతో, ఇరాన్ ప్రకటించిన ఈ 500 కిలోమీటర్ల జోన్ పశ్చిమ దేశాలకు, ముఖ్యంగా అమెరికాకు పెద్ద సవాల్‌గా మారింది. ఈ ప్రాంతంలో సంచరించే విదేశీ యుద్ధ నౌకలు , వాణిజ్య నౌకలు తమ అనుమతి లేదా నిబంధనలకు లోబడి ఉండాలని ఇరాన్ పరోక్షంగా హెచ్చరిస్తోంది. ఇప్పటికే మధ్యప్రాచ్యంలో యుద్ధ మేఘాలు కమ్ముకున్న వేళ, హార్ముజ్ జలసంధిని ఒక ఆపరేషనల్ జోన్‌గా మార్చడం ఉద్రిక్తతలను మరింత పెంచుతుందని నిపుణులు ఆందోళన వ్యక్తం చేస్తున్నారు.