మెలోడీ టాఫీ చుట్టూ ముదిరిన రాజకీయం

 

 ప్రధాని మోదీ 'టాఫీల బహుమతి'పై కాంగ్రెస్ తీవ్ర విమర్శలు.. 

దేశంలో ఆర్థిక సంక్షోభం ఉంటే ఇటలీలో రీల్స్ చేస్తున్నారంటూ రాహుల్ గాంధీ మండిపాటు, 

బీజేపీ స్ట్రాంగ్ కౌంటర్!

ఇటలీ ప్రధాని జార్జియా మెలోనికి భారత ప్రధాని నరేంద్ర మోదీ పార్లే 'మెలోడీ' టాఫీల ప్యాకెట్‌ను బహుమతిగా ఇవ్వడం, దానికి సంబంధించిన వీడియో సామాజిక మాధ్యమాల్లో వైరల్ కావడం ఇప్పుడు దేశీయ రాజకీయాల్లో పెద్ద దుమారానికి దారితీసింది. ఈ ఉదంతంపై ప్రతిపక్ష కాంగ్రెస్ పార్టీ ప్రధాని మోదీ లక్ష్యంగా తీవ్రస్థాయిలో విమర్శల దాడికి దిగింది. దేశంలో తీవ్రమైన ఆర్థిక సంక్షోభం నడుస్తుంటే, ప్రధాని మాత్రం ఇటలీలో చాక్లెట్లు పంచుతూ పబ్లిక్ రిలేషన్స్ (PR) స్టంట్లు చేస్తున్నారంటూ మండిపడింది. అయితే, ఈ విమర్శలపై కేంద్ర ప్రభుత్వం మరియు అధికార బీజేపీ కూడా అంతే బలంగా స్పందిస్తూ, ప్రధాని మోదీ నేతృత్వంలో భారతదేశానికి దక్కుతున్న అంతర్జాతీయ గౌరవాన్ని కాంగ్రెస్ తట్టుకోలేకపోతోందని ఎదురుదాడికి దిగింది.

రాయ్‌బరేలి, అమేథీ నియోజకవర్గాల పర్యటనలో ఉన్న కాంగ్రెస్ అగ్రనేత రాహుల్ గాంధీ ఎక్స్ (ట్విటర్) వేదికగా ప్రధానిపై తీవ్రంగా విరుచుకుపడ్డారు. "ఇది దేశ నాయకత్వం కాదు.. కేవలం ఒక గిమ్మిక్" అని ఆయన వ్యాఖ్యానించారు. దేశంలోని రైతులు, కార్మికులు, వ్యాపారులు మరియు యువత తీవ్రమైన ఇబ్బందులు పడుతూ కన్నీరు పెడుతుంటే, ప్రధాన మంత్రి మాత్రం విదేశాల్లో నవ్వుతూ రీల్స్ చేసుకుంటున్నారని, దానికి బీజేపీ శ్రేణులు చప్పట్లు కొడుతున్నాయని హిందీలో చేసిన పోస్టులో విమర్శించారు. దేశంపై ఆర్థిక తుఫాను ముంచుకొస్తున్న తరుణంలో ప్రధాని ఇటలీలో క్యాండీలు పంచడంలో బిజీగా ఉన్నారని ఆరోపించారు. అమేథీలో కార్యకర్తలను ఉద్దేశించి మాట్లాడుతూ.. ఇటలీ వెళ్ళేముందు దేశంలో ఆర్థిక ఇబ్బందులు ఉన్నాయని, ఎవరూ విదేశాలకు వెళ్లవద్దని ఉపన్యాసాలు దంచిన మోదీ, తీరా తనే జేబులో మెలోడీ చాక్లెట్ పెట్టుకుని ఖరీదైన విమానంలో ఇటలీకి వెళ్లి రీల్స్ చేశారని, దేశ ప్రజలతో ఇంతకంటే పెద్ద హాస్యం మరొకటి ఉండదని ఎద్దేవా చేశారు. నీట్ పరీక్ష రద్దు కావడం, యువత తీవ్రమైన నిరాశలో ఉండటం, గ్యాస్, పెట్రోల్ ధరలు మరియు ద్రవ్యోల్బణం నిరంతరం పెరుగుతున్నా ప్రధానికి పట్టడం లేదని రాహుల్ విమర్శించారు.

కాంగ్రెస్ జాతీయ అధ్యక్షుడు మల్లికార్జున ఖర్గే కూడా ఈ విషయమై ప్రధాని మోదీపై ధ్వజమెత్తారు. నిరుద్యోగం, ధరల పెరుగుదల, పేపర్ లీకేజీలు, పడిపోతున్న రూపాయి విలువతో దేశ ఆర్థిక వ్యవస్థ అతలాకుతలమవుతున్నా ప్రధాని తన ప్రచార ఆర్బాటాలను ఆపడం లేదని మండిపడ్డారు. మోదీ ప్రభుత్వం చేస్తున్న దోపిడీ వల్ల ప్రజలు నరకం అనుభవిస్తుంటే, వారు తన ఉపన్యాసాల 'మెలోడీ'ని ఆస్వాదించాలని ప్రధాని కోరుకుంటున్నారని ఎక్స్‌లో విమర్శించారు. కాంగ్రెస్ అధికార ప్రతినిధి సుప్రియా శ్రీనేత్ ఈ బహుమతిపై స్పందిస్తూ.. 75 ఏళ్ల వయసున్న ప్రధానికి 49 ఏళ్ల మెలోనిపై పితృవాత్సల్యం ఉండటంలో తప్పులేదని, కానీ ఒక దేశాధినేతగా విదేశీ పర్యటనకు వెళ్లినప్పుడు ఇలా టాఫీలు ఇవ్వడం ఏమాత్రం తగినది కాదని, ఇది అత్యంత విచిత్రంగా (Cringe Pro Max) ఉందని వ్యాఖ్యానించారు. మరో నేత పవన్ ఖేరా మాట్లాడుతూ.. ప్రజలను బంగారం కొనవద్దని, విదేశీ ప్రయాణాలు వాయిదా వేసుకోవాలని కోరిన ప్రధాని, తనకు మాత్రం అలాంటి నియమాలు వర్తింపజేసుకోకపోవడం సరికాదన్నారు.

ఈ విమర్శలపై కేంద్ర వాణిజ్య శాఖ మంత్రి పీయూష్ గోయల్ గట్టిగా స్పందించారు. రాహుల్ గాంధీకి భారతదేశం సాధిస్తున్న ప్రతి విజయంపై ఏడవడం అలవాటుగా మారిందని, మోదీ నాయకత్వంలో దేశానికి దక్కుతున్న అంతర్జాతీయ గుర్తింపును ఆయన భరించలేకపోతున్నారని మండిపడ్డారు. "రాహుల్ గాంధీకి భారతదేశం అన్నా, భారత్‌లో తయారయ్యే వస్తువులన్నా ఎందుకంత ద్వేషం?" అని ప్రశ్నించారు. అంతేకాకుండా, భారతదేశపు 'టాఫీ కథ' వినడానికి ఎంతో మధురంగా ఉంటుందని, 2013-14తో పోలిస్తే దేశం నుండి చాక్లెట్లు, టాఫీల ఎగుమతులు ఏకంగా 166 శాతం వృద్ధి సాధించాయని గోయల్ గణాంకాలతో వివరించారు. మరోవైపు బీజేపీ ప్రతినిధి ప్రదీప్ భండారీ స్పందిస్తూ.. మోదీ-మెలోని (MELODI) బంధం ఈ చాక్లెట్‌తో మరింత మధురంగా మారిందంటూ సామాజిక మాధ్యమాల్లో కౌంటర్ ఇచ్చారు.