సీబీఎస్ఈ విద్యార్థులకు భారీ అప్‌డేట్

 

• 9, 10 తరగతులకు 'త్రిభాషా సూత్రం' తప్పనిసరి
• జూలై 1 నుండి అమల్లోకి రానున్న కొత్త నిబంధనలు

దేశవ్యాప్తంగా ఉన్న సీబీఎస్ఈ (CBSE) పాఠశాలల్లో చదువుకునే విద్యార్థుల విద్యా విధానంలో కేంద్ర మాధ్యమిక్‌ విద్యా బోర్డు ఒక చరిత్రాత్మక మార్పును ప్రకటించింది. రాబోయే విద్యా సంవత్సరం (2026-27) నుంచి 9 , 10 తరగతుల విద్యార్థులకు మూడు భాషల (R1, R2, R3) అధ్యయనాన్ని తప్పనిసరి చేస్తూ బోర్డు అధికారిక సర్క్యులర్ జారీ చేసింది. జాతీయ విద్యా విధానం (NEP) 2020 , నేషనల్ కరికులం ఫ్రేమ్‌వర్క్ (NCF-SE) 2023 మార్గదర్శకాలకు అనుగుణంగా ఈ విప్లవాత్మక నిర్ణయం తీసుకున్నట్లు మే 15న విడుదల చేసిన నోటిఫికేషన్‌లో బోర్డు స్పష్టం చేసింది. ఈ కొత్త త్రిభాషా విధానం 2026 జూలై 1వ తేదీ నుంచి దేశవ్యాప్తంగా ఉన్న అన్ని సీబీఎస్ఈ అనుబంధ పాఠశాలల్లో పూర్తిస్థాయిలో అమల్లోకి రానుంది.

ఈ నూతన నిబంధనల ప్రకారం.. విద్యార్థులు ఎంచుకునే మూడు భాషలలో కనీసం రెండు భాషలు తప్పనిసరిగా భారతదేశానికి చెందిన స్థానిక లేదా మాతృభాషలై ఉండాలి. ఒకవేళ ఎవరైనా విద్యార్థి ఫ్రెంచ్, జర్మన్ వంటి విదేశీ భాషను చదవాలని అనుకుంటే, వారు ఎంచుకునే మిగిలిన రెండు భాషలు  కచ్చితంగా భారతీయ భాషలే అయి ఉండాలి. లేదా విదేశీ భాషను అదనంగా నాల్గవ భాషగా కూడా చదువుకునే అవకాశాన్ని బోర్డు కల్పించింది. ఈ విద్యా సంవత్సరం ఇప్పటికే ఏప్రిల్ నెలలోనే ప్రారంభమైనప్పటికీ, విద్యార్థులకు ఎలాంటి ఇబ్బంది కలగకుండా ఒక క్రమబద్ధమైన పరివర్తన విధానం (Transitional Approach) ద్వారా దీనిని అమలు చేయనున్నారు. మిడిల్ స్కూల్ మరియు హైస్కూల్ స్థాయిల్లో రీడింగ్, గ్రామర్, రైటింగ్ స్కిల్స్ వంటి భాషా నైపుణ్యాలు దాదాపు 75 నుంచి 80 శాతం ఒకేలా ఉంటాయని బోర్డు ఈ సందర్భంగా గుర్తుచేసింది.

కొత్త విధానం అమలులో భాగంగా పాఠ్యపుస్తకాలు, ఉపాధ్యాయుల కొరత వంటి సవాళ్లను అధిగమించేందుకు సీబీఎస్ఈ పలు ప్రత్యామ్నాయ మార్గదర్శకాలను ప్రకటించింది. 9వ తరగతి విద్యార్థులకు ప్రస్తుతానికి మూడవ భాష (R3) కోసం ప్రత్యేక పుస్తకాలు అందుబాటులోకి వచ్చే వరకు, వారు తాము ఎంచుకున్న భాషకు సంబంధించిన 6వ తరగతి పాఠ్యపుస్తకాలను ఉపయోగించుకోవచ్చు. వీటికి అదనంగా స్థానిక కథలు, కవితలు, నవలలను కూడా బోధించాలని పాఠశాలలకు సూచించారు. జూలై 1 నాటికి 19 అధికారిక భారతీయ భాషలకు సంబంధించిన 6వ తరగతి పుస్తకాలను అందుబాటులో ఉంచుతామని, దీనిపై సమగ్ర గైడ్‌లైన్స్‌ను జూన్ 15 లోపు విడుదల చేస్తామని బోర్డు తెలిపింది. అలాగే, మాతృభాషా ఉపాధ్యాయుల కొరత ఉన్న చోట రిటైర్డ్ టీచర్లను నియమించుకోవడం, పీజీ అర్హత ఉన్న వారిని తీసుకోవడం లేదా హైబ్రిడ్ ఆన్‌లైన్ క్లాసుల ద్వారా 'సహోదయ' క్లస్టర్ల సహాయంతో పాఠశాలలు పరస్పరం ఉపాధ్యాయులను పంచుకునే వెసులుబాటును కల్పిస్తూ సీబీఎస్ఈ కీలక ఉపశమనం కలిగించింది.