అస్సాం ముఖ్యమంత్రిగా మళ్లీ హిమంత బిశ్వ శర్మ

• వరుసగా రెండోసారి పగ్గాలు .. మే 12న ప్రమాణ స్వీకారం!

అస్సాం రాజకీయాల్లో భారతీయ జనతా పార్టీ తన జైత్రయాత్రను కొనసాగిస్తూ వరుసగా మూడోసారి అధికార పీఠాన్ని దక్కించుకుంది. బీజేపీ శాసనసభా పక్ష నేతగా ఏకగ్రీవంగా ఎన్నికైన డాక్టర్ హిమంత బిశ్వ శర్మను ముఖ్యమంత్రిగా నియమిస్తూ రాష్ట్ర గవర్నర్ లక్ష్మణ్ ప్రసాద్ ఆచార్య ఆదివారం అధికారిక ఉత్తర్వులు జారీ చేశారు. గౌహతిలోని లోక్ భవన్‌లో గవర్నర్‌ను కలిసిన హిమంత, తన కూటమికి ఉన్న 102 మంది ఎమ్మెల్యేల మద్దతు పత్రాన్ని సమర్పించి ప్రభుత్వం ఏర్పాటుకు అనుమతి కోరారు. రాజ్యాంగంలోని 164వ అధికరణం ప్రకారం గవర్నర్ ఈ నియామకాన్ని ఖరారు చేస్తూ, మే 12వ తేదీ ఉదయం 11:40 గంటలకు ఖానాపారాలోని వెటర్నరీ కాలేజ్ మైదానంలో ప్రమాణ స్వీకార కార్యక్రమం ఉంటుందని వెల్లడించారు. అస్సాం చరిత్రలో కాంగ్రెస్ నేత కాని ఒక నాయకుడు వరుసగా రెండుసార్లు ముఖ్యమంత్రి పదవిని చేపట్టడం ఇదే తొలిసారి కావడం విశేషం.

ఇటీవల జరిగిన అసెంబ్లీ ఎన్నికల్లో బీజేపీ నేతృత్వంలోని ఎన్‌డీఏ (NDA) కూటమి ప్రభంజనం సృష్టించింది. మొత్తం 126 స్థానాలకు గానూ బీజేపీ ఒంటరిగానే 82 సీట్లు గెలుచుకోగా, మిత్రపక్షాలైన అసోం గణ పరిషత్ (AGP), బోడోలాండ్ పీపుల్స్ ఫ్రంట్ (BPF) తలో 10 సీట్లు సాధించాయి. ఫలితంగా 102 సీట్ల భారీ మెజారిటీతో కూటమి పట్టు సాధించింది. ఈ విజయం ప్రధాని నరేంద్ర మోదీ అభివృద్ధి విధానాలకు ప్రజలు ఇచ్చిన తీర్పు అని బీజేపీ జాతీయ అధ్యక్షుడు జేపీ నడ్డా కొనియాడారు. హిమంత బిశ్వ శర్మ నాయకత్వంలో అస్సాం గత ఐదేళ్లలో కేంద్ర పథకాలను అద్భుతంగా అమలు చేసిందని, రాబోయే ఐదేళ్లలో కూడా జవాబుదారీతనంతో కూడిన సుపరిపాలన కొనసాగుతుందని ఆయన ఆశాభావం వ్యక్తం చేశారు.

హిమంత బిశ్వ శర్మ తన ఎన్నిక అనంతరం మాట్లాడుతూ, ప్రధాని మోడీ అస్సాం అభివృద్ధిపై చూపిస్తున్న ప్రత్యేక శ్రద్ధే ఈ విజయానికి కీలకమని పేర్కొన్నారు. అన్ని వర్గాల ప్రజల సంక్షేమం కోసం తమ ప్రభుత్వం రెట్టింపు ఉత్సాహంతో పనిచేస్తుందని ఆయన భరోసా ఇచ్చారు. మే 12న జరగబోయే ఈ ప్రమాణ స్వీకార మహోత్సవానికి ప్రధానమంత్రి నరేంద్ర మోడీ, కేంద్ర హోంమంత్రి అమిత్ షా, రక్షణ మంత్రి రాజనాథ్ సింగ్‌తో పాటు పలువురు కేంద్ర మంత్రులు, బీజేపీ పాలిత రాష్ట్రాల ముఖ్యమంత్రులు హాజరుకానున్నారు. 2016లో శర్బానంద సోనోవాల్‌తో ప్రారంభమైన బీజేపీ పాలన, 2021లో హిమంతకు బదిలీ అయి, ఇప్పుడు మళ్ళీ ఆయన నాయకత్వంలోనే మూడో ఇన్నింగ్స్‌ను ప్రారంభించబోతుండటం రాష్ట్ర రాజకీయాల్లో ఒక చారిత్రాత్మక ఘట్టంగా నిలిచింది.