కర్ణాటకలో హిజాబ్ నిషేధం ఎత్తివేత

• పాఠశాలల్లో మతపరమైన చిహ్నాలకు సిద్ధరామయ్య సర్కార్ అనుమతి
• 2022 నాటి వివాదాస్పద ఉత్తర్వులను రద్దు చేస్తూ కీలక నిర్ణయం

కర్ణాటకలోని సిద్ధరామయ్య నేతృత్వంలోని కాంగ్రెస్ ప్రభుత్వం బుధవారం  సంచలన నిర్ణయం తీసుకుంది. 2022లో అప్పటి బీజేపీ ప్రభుత్వం పాఠశాలలు, కళాశాలల్లో హిజాబ్‌ను నిషేధిస్తూ జారీ చేసిన ఉత్తర్వులను రద్దు చేస్తున్నట్లు ప్రకటించింది. కొత్త మార్గదర్శకాల ప్రకారం, విద్యార్థులు తమ యూనిఫాంతో పాటు హిజాబ్, తలపాగా (టర్బన్), జనివారం (యజ్ఞోపవీతం), రుద్రాక్ష మాలలు వంటి సంప్రదాయ , మతపరమైన చిహ్నాలను ధరించడానికి అనుమతినిచ్చింది. విద్యాసంస్థల్లో క్రమశిక్షణను కాపాడుతూనే, రాజ్యాంగం కల్పించిన విద్యా హక్కు , వ్యక్తిగత విశ్వాసాలకు గౌరవం ఇవ్వాలనే ఉద్దేశంతో ఈ నిర్ణయం తీసుకున్నట్లు ప్రభుత్వం స్పష్టం చేసింది. గత కొంతకాలంగా రాష్ట్రంలో జనివారం , హిజాబ్ అంశాలపై తలెత్తిన వివాదాల నేపథ్యంలో ఈ పరిణామం ప్రాధాన్యం సంతరించుకుంది. పాఠశాల విద్యాశాఖ విడుదల చేసిన తాజా ఆదేశాల ప్రకారం.. ప్రభుత్వ, ప్రైవేటు , ఎయిడెడ్ విద్యాసంస్థల్లో యూనిఫాం నిబంధన యథాతథంగా కొనసాగుతుంది. అయితే, యూనిఫాంలోని ప్రాథమిక రూపానికి భంగం కలగకుండా అదనంగా ఈ మతపరమైన చిహ్నాలను ధరించవచ్చు. విద్యార్థుల గుర్తింపునకు లేదా భద్రతకు ఎటువంటి ఆటంకం కలగకుండా ఈ సంప్రదాయాలను పాటించవచ్చని విద్యాశాఖ మంత్రి మధు బంగారప్ప వెల్లడించారు. ఈ చిహ్నాలను ధరించిన కారణంతో ఏ విద్యార్థిని తరగతి గదిలోకి లేదా పరీక్షా హాల్లోకి రాకుండా అడ్డుకోకూడదని అధికారులను ఆదేశించారు. సెక్యులరిజం అంటే వ్యక్తిగత నమ్మకాలకు వ్యతిరేకం కాదని, అందరినీ సమానంగా గౌరవించడమేనని ప్రభుత్వం తన ఉత్తర్వుల్లో పేర్కొంది. కాగా, ఈ అంశంపై గతంలో సుప్రీంకోర్టులో భిన్నమైన తీర్పులు వచ్చిన నేపథ్యంలో, తాజా నిర్ణయం రాజకీయంగా చర్చకు దారితీసే అవకాశం ఉంది.