పోక్సో కేసులో మధ్యంతర రక్షణకు నిరాకరించిన తెలంగాణ హైకోర్టు- లీగల్ చిక్కుల్లో బండి సాయి భగీరథ్!
కేంద్ర హోంశాఖ సహాయ మంత్రి బండి సంజయ్ కుమార్ కుమారుడు బండి సాయి భగీరథ్కు తెలంగాణ హైకోర్టులో గట్టి ఎదురుదెబ్బ తగిలింది. దేశవ్యాప్తంగా సంచలనం సృష్టిస్తున్న 'పోక్సో' (POCSO) కేసులో తనకు అరెస్ట్ నుంచి ముందస్తు లేదా మధ్యంతర రక్షణ కల్పించాలంటూ ఆయన దాఖలు చేసిన పిటిషన్ను న్యాయస్థానం శుక్రవారం (మే 15న) తిరస్కరించింది. ఒక మైనర్ బాలికపై లైంగిక దాడికి పాల్పడ్డారనే తీవ్రమైన ఆరోపణలపై నమోదైన ఈ కేసులో చట్టపరమైన చర్యల నుంచి ఉపశమనం పొందేందుకు భగీరథ్ చేసిన ప్రయత్నాలు ఫలించలేదు. దీంతో ఈ హైప్రొఫైల్ కేసులో ఆయనకు అరెస్ట్ ముప్పు పొంచి ఉందనే చర్చ రాజకీయ, న్యాయవర్గాల్లో జోరందుకుంది.
ఈ కేసు వివరాల్లోకి వెళితే.. 2025 అక్టోబర్ మరియు డిసెంబర్ మాసాల మధ్య కాలంలో సాయి భగీరథ్ ఒక మైనర్ బాలికపై లైంగిక దాడికి పాల్పడినట్లు ఆరోపణలు వచ్చాయి. గత ఏడాది జూన్ నెలలో ఉమ్మడి స్నేహితుల ద్వారా వీరిద్దరికీ పరిచయం ఏర్పడినట్లు తెలుస్తోంది. భగీరథ్ తన కుమార్తెను నిరంతరం లైంగికంగా వేధించడంతో పాటు తీవ్రమైన మానసిక బ్లాక్మెయిలింగ్కు గురిచేశాడని, ఆమెను స్నేహితులకు దూరం చేసి, ఆమె కెరీర్ నిర్ణయాలను కూడా తన గుప్పిట్లోకి తీసుకుని నియంత్రించాడని ఆరోపిస్తూ బాధితురాలి తల్లి మే 8వ తేదీన పేట్బషీరాబాద్ పోలీస్ స్టేషన్లో లిఖితపూర్వకంగా ఫిర్యాదు చేశారు. అంతేకాకుండా, జర్నలిస్టు నుంచి బీజేపీ నాయకుడిగా మారిన సంగప్ప అనే వ్యక్తి తమను సంప్రదించి, కేంద్ర మంత్రి బండి సంజయ్తో సమావేశం ఏర్పాటు చేస్తామని చెప్పి, రాజకీయ ప్రభావంతో తమ కుటుంబాన్ని భయభ్రాంతులకు గురిచేయడానికి ప్రయత్నించారని కూడా బాధితురాలి తల్లి తన ఫిర్యాదులో పేర్కొన్నారు.
మొదట ఈ కేసును మహిళా గౌరవానికి భంగం కలిగించడం , పోక్సో చట్టంలోని సాధారణ నిబంధనల కింద నమోదు చేసినప్పటికీ, మెజిస్ట్రేట్ ముందు బాధితురాలి వాంగ్మూలాన్ని రికార్డు చేసిన తర్వాత పోలీసులు ఈ కేసులో సెక్షన్లను మార్చారు. భగీరథ్పై అత్యంత తీవ్రమైన 'అగ్రివేటెడ్ సెక్షువల్ అస్సాల్ట్' (మరింత ఘోరమైన లైంగిక దాడి) కింద పోక్సో కేసును నమోదు చేశారు. అయితే, ఈ ఆరోపణలను సాయి భగీరథ్ పూర్తిగా తోసిపుచ్చారు. సదరు బాలిక కుటుంబం తనపై అక్రమ వసూళ్లకు (Extortion) పాల్పడుతోందంటూ ఆయన ఎదురు కేసు పెట్టారు. ఆ బాలికను వివాహం చేసుకోవాలంటూ ఆమె తల్లిదండ్రులు తనపై ఒత్తిడి తెచ్చారని, లేకపోతే తప్పుడు వేధింపుల కేసు పెడతామని బెదిరించారని ఆయన ఆరోపించారు. వారి బెదిరింపులకు భయపడి తాను ఇప్పటికే బాలిక తండ్రికి 50 వేల రూపాయలు ఇచ్చానని, అయినప్పటికీ తనను మానసికంగా వేధిస్తూ, ఒకవేళ 5 కోట్ల రూపాయలు ఇవ్వకపోతే ఆ బాలిక తల్లి ఆత్మహత్య చేసుకుంటుందని బ్లాక్మెయిల్ చేస్తున్నారని భగీరథ్ కోర్టుకు తెలిపినప్పటికీ, హైకోర్టు మాత్రం అతనికి ఎలాంటి మధ్యంతర ఉపశమనం ఇవ్వడానికి అంగీకరించలేదు.
No comments:
Post a Comment