రాజీవ్ కలల భారతదేశం నేడు ఎక్కడ?

• మాజీ ప్రధాని వర్ధంతి వేళ మణిశంకర్ అయ్యర్ భావోద్వేగ వ్యాఖ్యలు.. 
• ఆయన చూపిన బాటలోకి దేశాన్ని మళ్లీ తీసుకురావడం అత్యంత అవసరమని పిలుపు!

భారతదేశ మాజీ ప్రధాన మంత్రి రాజీవ్ గాంధీ వర్ధంతి సందర్భంగా దిల్లీలోని ఆయన సమాధి స్థలం 'వీరభూమి' వద్ద నివాళులర్పించిన అనంతరం కాంగ్రెస్ సీనియర్ నాయకుడు మణిశంకర్ అయ్యర్ తీవ్ర భావోద్వేగానికి లోనయ్యారు. ఈ సందర్భంగా ఆయన చేసిన వ్యాఖ్యలు రాజకీయ వర్గాల్లో ఒక లోతైన ఆలోచనను రేకెత్తిస్తున్నాయి. రాజీవ్ గాంధీ జీవితం, ఆయన దార్శనికత, దేశం కోసం ఆయన చేసిన కృషి ,ఆయనకు ఉన్న ఆధునిక, భవిష్యత్తు ఆలోచనల గురించి వీరభూమిపై లిఖించి ఉన్న ప్రతి మాటను చదివినప్పుడల్లా తాను ఎంతో లోతుగా ఆలోచిస్తానని అయ్యర్ పేర్కొన్నారు. రాజీవ్ గాంధీ మరణించి దాదాపు 35 సంవత్సరాలు కావస్తున్నా, నాడు ఆయన భారతదేశం కోసం కన్న కలలలో నేడు చాలా తక్కువ భాగం మాత్రమే మిగిలి ఉందనే భావన తనను ఎంతగానో కలచివేస్తోందని ఆవేదన వ్యక్తం చేశారు. దేశాన్ని మళ్లీ రాజీవ్ గాంధీ ఆశించిన ప్రగతి పథంలోకి, పునర్నిర్మాణ దిశగా నడిపించాలనుకుంటే.. భారతదేశాన్ని తిరిగి ఆయన చూపిన ఆనాటి సమున్నత మార్గంలోకి తీసుకురావడం ఈ తరుణంలో అత్యంత కీలకమని మణిశంకర్ అయ్యర్ దేశ ప్రజలకు పిలుపునిచ్చారు.