ఎన్నికల వరకు ఆశ్రమమే నా నివాసం

ప్రశాంత్ కిశోర్ సంచలన నిర్ణయం.. 

పట్నా శివార్లకు బస మార్పు.. 

నితీశ్ కుమార్, సామ్రాట్ చౌదరిలపై పీకే నిప్పులు!

జన సూరాజ్ పార్టీ (Jan Suraaj Party) వ్యవస్థాపకుడు, ప్రముఖ రాజకీయ వ్యూహకర్త ప్రశాంత్ కిశోర్ బీహార్ రాజకీయాల్లో ఒక ఆసక్తికరమైన నిర్ణయంతో వార్తల్లో నిలిచారు. వచ్చే బీహార్ అసెంబ్లీ ఎన్నికలలో తన సరికొత్త పార్టీ పూర్తిస్థాయిలో స్థిరపడేంత వరకు తాను పట్నా శివార్లలోని ఒక ఆశ్రమంలోనే నివసిస్తానని ఆయన ప్రకటించారు. దర్భంగాలో బుధవారం నాడు విలేకరులతో మాట్లాడిన 48 ఏళ్ల ప్రశాంత్ కిశోర్.. పట్నాలో తాను ఉంటున్న పాత నివాసాన్ని మంగళవారం రాత్రే ఖాళీ చేసినట్లు వెల్లడించారు. పట్నా ఐఐటీ (IIT-Patna) కి సమీపంలో ఉన్న 'బీహార్ నవనిర్మాణ ఆశ్రమం' ఇకపై తన నివాసమని, రాబోయే శాసనసభ ఎన్నికల్లో జన సూరాజ్ పార్టీ తన ముద్ర వేసేంత వరకు అక్కడి నుంచే రాజకీయ కార్యకలాపాలను నడిపిస్తానని స్పష్టం చేశారు. 2024లో రాజకీయ కన్సల్టెన్సీని వీడి పార్టీని స్థాపించిన కిశోర్.. ఇప్పటివరకు పట్నా విమానాశ్రయం సమీపంలో ఉన్న 'షేక్‌పురా హౌస్' బంగ్లా నుంచి కార్యకలాపాలు సాగించారు. ఈ బంగ్లా జన సూరాజ్ పార్టీ జాతీయ అధ్యక్షుడు, మాజీ ఎంపీ ఉదయ్ సింగ్‌కు చెందింది కావడం గమనార్హం.

ఇదే సమయంలో ప్రశాంత్ కిశోర్ బీహార్ మాజీ ముఖ్యమంత్రి నితీశ్ కుమార్‌పై తీవ్రస్థాయిలో విమర్శలు గుప్పించారు. గత నెలలోనే నితీశ్ కుమార్ ముఖ్యమంత్రి పదవికి రాజీనామా చేసి రాజ్యసభకు వెళ్లిన విషయాన్ని ప్రస్తావిస్తూ తీవ్ర వ్యంగ్యాస్త్రాలు సంధించారు. రాష్ట్రంలో ఆర్థిక ఇబ్బందుల వల్ల జరుగుతున్న వలసలను అడ్డుకోవడంలో విఫలమైన ఒక మాజీ ముఖ్యమంత్రి, చివరకు తానే స్వయంగా రాజ్యసభకు వలస వెళ్లారని మండిపడ్డారు. అయితే అలా వెళ్లేముందు.. ప్రస్తుత ముఖ్యమంత్రి సామ్రాట్ చౌదరి నేతృత్వంలోని బీజేపీ కూటమి ప్రభుత్వంలో తన కుమారుడు నిశాంత్ కుమార్‌కు రాజకీయ పీఠం దక్కేలా నితీశ్ చక్రం తిప్పారని ఆరోపించారు. బీహార్ ఓటర్లు కులం, మతం లేదా డబ్బు ఆశకు లొంగిపోకుండా తమ సొంత ప్రయోజనాలకు, పిల్లల భవిష్యత్తుకు ప్రాధాన్యతనిచ్చి ఓటు వేయాలని పిలుపునిచ్చారు. ఎన్నికల ముందు ప్రవేశపెట్టిన 'ముఖ్యమంత్రి మహిళా రోజ్ గార్ యోజన' కింద అందిన పది వేల రూపాయల వంటి పథకాలకు ఆకర్షితులు కావద్దని, ప్రధాని నరేంద్ర మోదీ, నితీశ్ కుమార్ లేదా లాలూ ప్రసాద్ యాదవ్ వంటి నాయకుల మాటలకు లొంగిపోవద్దని కోరారు.

పశ్చిమాసియా (Middle East) లో నెలకొన్న ఉద్రిక్త పరిస్థితుల వల్ల దేశంలో తీవ్ర ఆర్థిక సవాళ్లు ఎదురయ్యే ప్రమాదం ఉందని ప్రశాంత్ కిశోర్ హెచ్చరించారు. రాబోయే రోజుల్లో ఇంధన ధరలు లీటరుకు పది రూపాయల వరకు పెరిగే అవకాశం ఉందని, అంతేకాకుండా దేశంలో తీవ్రమైన ఎరువుల కొరత ఏర్పడబోతోందని ఆందోళన వ్యక్తం చేశారు. ఇప్పటివరకు ఎరువుల బ్లాక్ మార్కెట్ గురించి ఫిర్యాదు చేసిన రైతులకు.. ఇకపై అసలు ఎరువులే దొరకని పరిస్థితి రాబోతోందని చెప్పారు. మరోవైపు ప్రస్తుత ముఖ్యమంత్రి సామ్రాట్ చౌదరి ప్రభుత్వ దుబారా ఖర్చులను ఆయన తీవ్రంగా తప్పుపట్టారు. బీహార్ దేశంలోనే అత్యంత పేద రాష్ట్రమైనప్పటికీ, ఇక్కడి ముఖ్యమంత్రి ఏకంగా 25 ఎకరాల విస్తీర్ణంలోని భారీ నివాసంలో ఉంటున్నారని ఆరోపించారు. ఆ నివాసంలోని తోటల నిర్వహణకే లక్షలాది రూపాయల ప్రజాధనం వృథా అవుతోందని, ఇప్పుడు దానికి తోడు తాను గతంలో డిప్యూటీ సీఎంగా ఉన్నప్పటి బంగ్లాను కూడా సీఎం నివాసంతో విలీనం చేసి నివాస ప్రాంగణాన్ని మరింత విస్తరించాలని సామ్రాట్ చౌదరి చూస్తున్నారని పీకే తీవ్ర విమర్శలు చేశారు.