యూపీలో భానుడి భగభగలు, కరెంట్ కోతలతో నరకప్రాయమైన జనజీవనం

•  యోగి ప్రభుత్వంపై కాంగ్రెస్ నేత సుప్రియా శ్రీనేత్ తీవ్ర ఆగ్రహం

న్యూఢిల్లీ: ఉత్తరప్రదేశ్ రాష్ట్రంలో ఎండ తీవ్రత, అంతకంతకూ పెరుగుతున్న విద్యుత్ కోతలపై కాంగ్రెస్ జాతీయ అధికార ప్రతినిధి సుప్రియా శ్రీనేత్ తీవ్రస్థాయిలో ధ్వజమెత్తారు. దేశవ్యాప్తంగా రికార్డుస్థాయిలో ఎండలు మండిపోతున్న తరుణంలో, యూపీ ప్రజలు మాత్రం కరెంట్ లేక నరకం అనుభవిస్తున్నారని ఆమె ఆందోళన వ్యక్తం చేశారు. దేశంలోని 50 అత్యంత వేడి నగరాల జాబితాలో ఒక్క ఉత్తరప్రదేశ్ నుంచే 26 నగరాలు ఉన్నాయని, అయితే ఇంతటి తీవ్రమైన ఉష్ణోగ్రతల్లో కూడా ఆయా నగరాల్లో గంటల తరబడి విద్యుత్ సరఫరా నిలిచిపోవడం దారుణమని మండిపడ్డారు. మీరట్ నుంచి బల్లియా వరకు రాష్ట్రంలోని 75 జిల్లాల్లో విద్యుత్ కోతల వల్ల ప్రజలు హాహాకారాలు చేస్తున్నారని, 24 గంటల్లో కేవలం 7 నుంచి 8 గంటలు మాత్రమే కరెంట్ వస్తోందని సామాజిక మాధ్యమం ద్వారా ఆమె దుయ్యబట్టారు.

భీషణమైన వేడి, ఉక్కపోత కారణంగా కరెంట్ లేక విలవిలలాడుతున్న ప్రజలు అర్ధరాత్రి వేళల్లో రోడ్లపై పడుకోవాల్సిన దుస్థితి దాపురించిందని సుప్రియా శ్రీనేత్ ఆవేదన వ్యక్తం చేశారు. రాజధాని లక్నో వంటి ప్రధాన నగరంలోనే గంటల తరబడి కరెంట్ పోతుండటంతో ఆసుపత్రుల్లో ఎక్స్-రే, స్కాన్ వంటి అత్యవసర సేవలు కూడా నిలిచిపోయాయని పేర్కొన్నారు. కాన్పూర్ దేహాత్ మెడికల్ కాలేజీలో అర్ధరాత్రి వరకు కరెంట్ రాకపోవడంతో విద్యార్థులు రోడ్డుపైనే ధర్నాకు దిగారని గుర్తుచేశారు. విద్యుత్ లేకపోవడంతో మొబైల్ ఫోన్లు ఛార్జ్ కావడం లేదని, దీనివల్ల విద్యార్థుల ఆన్‌లైన్ చదువులు కూడా తీవ్రంగా దెబ్బతింటున్నాయని ఆమె తెలిపారు. ఈ అనాలోచిత కోతల వల్ల చిన్న పిల్లలు, వృద్ధులు, మహిళలు, రైతులు ఇలా ప్రతి ఒక్కరూ తీవ్ర ఇబ్బందులు పడుతున్నారని ఆరోపించారు.

ఇలాంటి దారుణ పరిస్థితుల్లో ఉత్తరప్రదేశ్‌లో కరెంట్ కావాలని అడిగితే సీఎం యోగి ఆదిత్యనాథ్ పోలీసులు జైల్లో పెడతారంటూ ఆమె తీవ్ర విమర్శలు గుప్పించారు. కరెంట్ లేక అల్లాడిపోతూ రోడ్లపైకి వస్తున్న నిస్సహాయ ప్రజలపై లాఠీచార్జ్ చేయించేందుకు విద్యుత్ శాఖ అధికారులు పోలీసులను పిలుస్తున్నారని మండిపడ్డారు. "ప్రస్తుతం కేవలం ఎండలకే ఇబ్బంది పడుతున్నారు.. నిరసనలు చేస్తే కేసులు కూడా ఎదుర్కోవాల్సి వస్తుంది" అంటూ పోలీస్ అధికారులు బహిరంగంగా ప్రజలను బెదిరిస్తున్నారని ఆమె ఆరోపించారు. యోగి గారు.. రాష్ట్రంలో రామరాజ్యం తర్వాత తీసుకురావచ్చు, ముందు ఈ భయంకరమైన ఎండలు, కరెంట్ కోతల నుండి ప్రజలకు విముక్తి కలిగించండి అని డిమాండ్ చేశారు. రాష్ట్రంలో 24 గంటల నిరంతర విద్యుత్ ఇస్తున్నామంటూ డబ్బా కొట్టుకుంటున్న మీ విద్యుత్ శాఖ మంత్రిని తక్షణమే బర్తరఫ్ చేయాలని, ఆ మంత్రి చేస్తున్నవన్నీ ఒట్టి అబద్ధపు హామీలేనని, వాటికి ప్రజలు తమ చెమటతో, నిస్సహాయతతో మూల్యం చెల్లించుకుంటున్నారని సుప్రియా శ్రీనేత్ తీవ్రస్థాయిలో విమర్శించారు.