ప్రధాని, హోంమంత్రిపై రాహుల్ గాంధీ వివాదాస్పద వ్యాఖ్యలు

• ఎఫ్‌ఐఆర్ నమోదు చేయాలని బీజేపీ యువమోర్చా ఫిర్యాదు!

లోక్‌సభ ప్రతిపక్ష నాయకుడు, కాంగ్రెస్ సీనియర్ నేత రాహుల్ గాంధీ చేసిన వ్యాఖ్యలు దేశ రాజకీయాల్లో తీవ్ర దుమారం రేపుతున్నాయి. ప్రధాన మంత్రి నరేంద్ర మోదీ, కేంద్ర హోంమంత్రి అమిత్ షా , రాష్ట్రీయ స్వయంసేవక్ సంఘ్ (RSS) సంస్థను ఉద్దేశించి ఆయన "దేశద్రోహులు" (Traitors) అని వ్యాఖ్యానించారంటూ భారతీయ జనతా యువమోర్చా (BJYM) పోలీసులను ఆశ్రయించింది. రాహుల్ గాంధీపై తక్షణమే ఎఫ్‌ఐఆర్ (FIR) నమోదు చేయాలని కోరుతూ బీజేపీ యువమోర్చా అధికార ప్రతినిధి అభిషేక్ దూబే దక్షిణ దిల్లీలోని తిగ్రి పోలీస్ స్టేషన్ ఎస్‌హెచ్‌ఓ (SHO) కు అధికారికంగా ఫిర్యాదు చేశారు.

రాయ్‌బరేలీలో జరిగిన ఒక బహిరంగ కార్యక్రమంలో రాహుల్ గాంధీ ప్రసంగిస్తూ.. ప్రధాన మంత్రి నరేంద్ర మోదీ, హోంమంత్రి అమిత్ షా ,ఆర్‌ఎస్‌ఎస్ దేశ ఆర్థిక వ్యవస్థను కార్పొరేట్ శక్తులకు అప్పగించి, రాజ్యాంగంపై దాడి చేయడం ద్వారా దేశానికి ద్రోహం చేశారని తీవ్ర ఆరోపణలు చేశారు. "ఆర్‌ఎస్‌ఎస్ కార్యకర్తలు మీ ముందుకు వచ్చినప్పుడు, వారు మోదీ, అమిత్ షాల గురించి మాట్లాడుతారు.. అప్పుడు మీ ప్రధాని, హోంమంత్రి, ఆ సంస్థ దేశద్రోహులని, భారతదేశాన్ని అమ్ముకోవడానికి, రాజ్యాంగాన్ని దెబ్బతీయడానికి పనిచేశారని వారి ముఖం మీదే చెప్పండి" అని రాహుల్ గాంధీ తన మద్దతుదారులకు పిలుపునిచ్చారు. అంతేకాకుండా, ప్రధాని మోదీ దేశ ఆర్థిక వ్యవస్థను అంబానీ, అదానీ మరియు అమెరికా చేతుల్లో పెట్టారని, దేశం తీవ్ర ఆర్థిక సంక్షోభం వైపు వెళ్తోందని, రాబోయే ఆర్థిక తుఫాను నుండి మోదీ ప్రభుత్వం ప్రజలను కాపాడలేదని విమర్శించారు.

రాహుల్ గాంధీ చేసిన ఈ వ్యాఖ్యలపై బీజేపీ శ్రేణులు తీవ్రస్థాయిలో ఆగ్రహం వ్యక్తం చేశాయి. రాహుల్ గాంధీ తక్షణమే దేశ ప్రజలకు బహిరంగ క్షమాపణ చెప్పాలని బీజేపీ డిమాండ్ చేసింది. బీజేపీ నేతలు ఆయన వ్యాఖ్యలను తీవ్రంగా ఖండిస్తూ, ఇవి ఆయన "అరాచక ఆలోచనా విధానాన్ని" (Anarchic Mindset) ,వరుస ఎన్నికల ఓటముల వల్ల కలిగిన తీవ్ర నిరాశ నిస్పృహలను ప్రతిబింబిస్తున్నాయని మండిపడ్డారు. పరస్పర గౌరవం, సామాజిక సామరస్యం ఉండే భారతీయ రాజకీయాల్లో ఇటువంటి చౌకబారు వ్యాఖ్యలు చేయడం అత్యంత విచారకరమని ఆక్షేపించారు. అయితే, ఈ వివాదంపై జమ్మూ కశ్మీర్ మాజీ ముఖ్యమంత్రి మెహబూబా ముఫ్తీ స్పందిస్తూ బీజేపీపై విమర్శలు గుప్పించారు. 2014 నుండి ప్రతిపక్షాలను, ముస్లింలను, లౌకికవాదులను బీజేపీ నిరంతరం 'దేశద్రోహులు' అని ముద్ర వేస్తూ 'పాకిస్థాన్, ఇరాన్‌కు వెళ్ళిపోండి' అని అంటున్నప్పుడు ఎవరూ నోరు మెదపలేదని, ఇప్పుడు రాహుల్ గాంధీ కేవలం ఒక ప్రకటన చేస్తే ఎందుకు ఇంత రచ్చ చేస్తున్నారని ప్రశ్నించారు. ఇది బీజేపీ తాను నాటిన విత్తనాల తాలూకు ఫలాలనే ఇప్పుడు అనుభవిస్తోందని ఆమె వ్యాఖ్యానించారు.