తూర్పు నుంచి దక్షిణం వరకు ఉత్కంఠభరిత పోరు

• హేమాహేమీల భవితవ్యాన్ని తేల్చనున్న కీలక నియోజకవర్గాలు
• బెంగాల్‌లో రికార్డుస్థాయిలో 92 శాతం పోలింగ్!

ఈ ఎన్నికల్లో ప్రజలు అసాధారణ ఉత్సాహాన్ని కనబరిచారు. ముఖ్యంగా పశ్చిమ బెంగాల్‌లో 92 శాతానికి పైగా పోలింగ్ నమోదు కాగా, పుదుచ్చేరిలో 90 శాతం, తమిళనాడులో 80 శాతం మధ్యలో,  కేరళలో 78 శాతానికి పైగా ఓటింగ్ నమోదైంది. ఈ భారీ ఓటింగ్ శాతం అధికార పక్షాలకు అనుకూలమా లేదా మార్పు కోసమా అన్నది ఆసక్తికరంగా మారింది. రాష్ట్రాల వారీగా ప్రధాన పోరు సాగుతున్న నియోజకవర్గాలు ఇలా ఉన్నాయి.

• పశ్చిమ బెంగాల్: సవాల్ విసురుతున్న నందిగ్రామ్, భవానీపూర్

పశ్చిమ బెంగాల్‌లో ముఖ్యమంత్రి మమతా బెనర్జీ తన పట్టును నిరూపించుకోవాల్సిన పరిస్థితి నెలకొన్నది. ఆమె తన సొంత నియోజకవర్గమైన భవానీపూర్‌తో పాటు, ప్రతిష్టాత్మకమైన నందిగ్రామ్‌లో కూడా గట్టి పోటీని ఎదుర్కొంటున్నారు. కోల్‌కతాలోని పట్టణ ప్రాంతాలైన టాలీగంజ్, రాష్‌బెహారీ స్థానాలు మమతా బెనర్జీ అభివృద్ధి మంత్రానికి , బీజేపీ విస్తరణ ప్రయత్నాలకు మధ్య పరీక్షగా నిలిచాయి. మొత్తం 31 నియోజకవర్గాలున్న దక్షిణ 24 పరగణాల జిల్లా బెంగాల్ పీఠం ఎవరిదనేది నిర్ణయించడంలో కీలకం కానుంది.

• అస్సాం -తమిళనాడు: వారసత్వం .. కొత్త శక్తులు

అస్సాంలో ముఖ్యమంత్రి హిమంత బిశ్వ శర్మ తన నియోజకవర్గమైన జలుక్బారీలో తన పట్టును నిరూపించుకోవాల్సి ఉంది. జోర్హాట్ , నజీరా వంటి నియోజకవర్గాల్లో గతంలో అత్యల్ప మెజారిటీలు ఉన్నందున, అక్కడ కాంగ్రెస్ , బీజేపీ మధ్య హోరాహోరీ పోరు సాగుతోంది. ఇక తమిళనాడులో ముఖ్యమంత్రి ఎం.కే. స్టాలిన్ కొలత్తూరులో తన బలాన్ని చాటుకోవాలని చూస్తుండగా, నటుడు విజయ్ నేతృత్వంలోని తమిళగ వెట్రి కళగమ్ (TVK) పార్టీ ప్రభావం పెరంబూర్ , తిరుచ్చి ఈస్ట్ స్థానాల్లో ఎలా ఉంటుందనేది ఆసక్తికరంగా మారింది. ఎడప్పాడి పళనిస్వామి తన సొంత నియోజకవర్గమైన ఎడప్పాడిలో గెలుపు ద్వారా ఏఐఏడీఎంకే ఉనికిని చాటాలని ప్రయత్నిస్తున్నారు.

• కేరళ -పుదుచ్చేరి: పట్టు కోసం ప్రయత్నం

కేరళలో నెమమ్ నియోజకవర్గం ఎల్‌డీఎఫ్, యూడీఎఫ్ , బీజేపీల మధ్య త్రిముఖ పోరుకు వేదికైంది. పుదుచ్చేరిలో ముఖ్యమంత్రి రంగసామి తన సొంత గడ్డ తట్టంచవాడిని కాపాడుకోవాల్సి ఉంది. ఇక్కడ దాదాపు 90 శాతం ఓటింగ్ నమోదు కావడంతో ప్రజాతీర్పు ఎటువైపు ఉంటుందనే ఉత్కంఠ నెలకొంది. ఈ కీలక నియోజకవర్గాల ఫలితాలే జాతీయ రాజకీయాల్లో ఆయా పార్టీల బలాబలాలను నిర్ణయించనున్నాయి.