ప్రజాస్వామ్య పవిత్రతకు ముప్పు

• కౌంటింగ్ విధుల్లో కాంట్రాక్ట్ ఉద్యోగుల నియామకంపై సువేందు అధికారి ధ్వజం

పశ్చిమ బెంగాల్ అసెంబ్లీ ఎన్నికల ఓట్ల లెక్కింపు ప్రక్రియలో కాంట్రాక్ట్ , తాత్కాలిక ఉద్యోగులను నియమించడంపై బీజేపీ నేత సువేందు అధికారి తీవ్ర ఆందోళన వ్యక్తం చేశారు. మే 4న జరగనున్న ఓట్ల లెక్కింపు కోసం పింగ్లా (227), దాస్పూర్ (230) అసెంబ్లీ నియోజకవర్గాల్లో జారీ చేసిన ఆదేశాలను ఆయన ప్రస్తావిస్తూ.. ఈవీఎంలు (EVMs), వీవీప్యాట్లు (VVPATs) , పోస్టల్ బ్యాలెట్ల వంటి అత్యంత సున్నితమైన అంశాలను నిర్వహించే బాధ్యతను శాశ్వత ఉద్యోగులకు కాకుండా కాంట్రాక్ట్ సిబ్బందికి ఎలా అప్పగిస్తారని ప్రశ్నించారు. ఇటువంటి నియామకాలు రాజకీయ ఒత్తిళ్లకు లోనయ్యే అవకాశం ఉందని, ఇది ఎన్నికల ఫలితాలను ప్రభావితం చేసే కుట్రలో భాగమని ఆయన ఆరోపించారు.  ఈ వ్యవహారంపై కేంద్ర ఎన్నికల సంఘం (ECI) , రాష్ట్ర ప్రధాన ఎన్నికల అధికారి తక్షణమే స్పందించి, కాంట్రాక్ట్ సిబ్బందిని తొలగించి కేవలం శాశ్వత ప్రభుత్వ ఉద్యోగులనే నియమించాలని ఆయన డిమాండ్ చేశారు. పశ్చిమ మేదినీపూర్ జిల్లా అంతటా కౌంటింగ్ సిబ్బందిపై సమగ్ర ఆడిట్ నిర్వహించాలని, ప్రజాస్వామ్య పవిత్రతను కాపాడాలని ఆయన విజ్ఞప్తి చేశారు. కాంట్రాక్ట్ ఉద్యోగుల నియామకం ద్వారా పాలక పక్షం ఫలితాలను తారుమారు చేసేందుకు ప్రయత్నిస్తోందని, ప్రజల తీర్పును కాపాడటానికి తాము వెనకడుగు వేయబోమని సువేందు అధికారి స్పష్టం చేశారు.