విజయ్ ఆశలపై ఏఐఏడీఎంకే నీళ్లు

• టీవీకేకు మద్దతు ఇచ్చే ప్రసక్తే లేదని తేల్చిచెప్పిన కేపీ మునుసామి!

తమిళనాడులో ప్రభుత్వ ఏర్పాటుకు ప్రయత్నిస్తున్న దళపతి విజయ్ నేతృత్వంలోని తమిళ వెట్రి కళగం (TVK)కు ఏఐఏడీఎంకే గట్టి షాక్ ఇచ్చింది. టీవీకే ప్రభుత్వానికి తాము మద్దతు ఇస్తామనే వార్తల్లో నిజం లేదని, విజయ్ పార్టీకి మద్దతు ఇచ్చే ప్రసక్తే లేదని ఏఐఏడీఎంకే డిప్యూటీ కోఆర్డినేటర్ కేపీ మునుసామి స్పష్టం చేశారు. ఒకవేళ ఏఐఏడీఎంకే మద్దతు ఇస్తే విజయ్ సులభంగా మెజారిటీ మార్కును దాటే అవకాశం ఉంటుందని అందరూ భావిస్తున్న తరుణంలో, మునుసామి చేసిన ఈ వ్యాఖ్యలు రాజకీయ వర్గాల్లో కలకలం రేపుతున్నాయి. పార్టీలో కొంతమంది ఎమ్మెల్యేలు విజయ్ వైపు మొగ్గు చూపుతున్నారనే ప్రచారాన్ని ఆయన తీవ్రంగా ఖండించారు. తమ పార్టీ సిద్ధాంతాలకు, విధానాలకు లోబడే తాము నిర్ణయాలు తీసుకుంటామని, ఇతర పార్టీల అధికార దాహానికి ఏఐఏడీఎంకే ఊతమివ్వబోదని ఆయన తేల్చిచెప్పారు. అసెంబ్లీ ఎన్నికల ఫలితాల తర్వాత రాష్ట్రంలో నెలకొన్న అనిశ్చితికి ఏఐఏడీఎంకే బాధ్యత వహించబోదని, ప్రతిపక్షంలో కూర్చోవడానికైనా సిద్ధమే తప్ప సంఖ్యాబలం కోసం అపవిత్ర పొత్తులకు తావులేదని మునుసామి వ్యాఖ్యానించారు. విజయ్ ఇప్పటికే కాంగ్రెస్ మద్దతు కూడగట్టుకున్నప్పటికీ, ప్రధాన ప్రతిపక్షమైన ఏఐఏడీఎంకే సహాయం లేనిదే ప్రభుత్వం ఏర్పాటు చేయడం కష్టసాధ్యంగా మారింది. మునుసామి ప్రకటనతో తమిళనాడులో రాజకీయ సంక్షోభం మరింత ముదిరినట్లయింది.