- సినీ పరిశ్రమకు తీరని లోటు
- విషాదంలో సినీ లోకం
దక్షిణాది చిత్ర పరిశ్రమలో 'సూపర్ గుడ్ ఫిల్మ్స్' అధినేతగా వందలాది విజయవంతమైన చిత్రాలను నిర్మించిన ఆర్.బి. చౌదరి (76) మంగళవారం రాజస్థాన్లోని బేవార్ జిల్లాలో జరిగిన రోడ్డు ప్రమాదంలో మరణించారు. రాజస్థాన్లోని లిలాంబా గ్రామంలో ఒక బంధువు వివాహానికి హాజరై తన మేనల్లుడితో కలిసి తిరిగి వస్తుండగా, జూంతా గ్రామం సమీపంలోని జాతీయ రహదారిపై ఈ ప్రమాదం చోటుచేసుకుంది. కారు ప్రయాణిస్తున్న సమయంలో అకస్మాత్తుగా పశువులు అడ్డు రావడంతో, వాహనం నియంత్రణ కోల్పోయి రోడ్డు పక్కన ఉన్న గోడను బలంగా ఢీకొట్టింది. ఈ ప్రమాద తీవ్రతకు ఆర్.బి. చౌదరి అక్కడికక్కడే ప్రాణాలు విడవగా, ఆయన డ్రైవర్ గౌతమ్ సీర్వీ తీవ్రంగా గాయపడ్డారు. ప్రస్తుతం డ్రైవర్ను మెరుగైన చికిత్స కోసం జోధ్పూర్ తరలించారు.
ఆర్.బి. చౌదరి మృతి పట్ల రాజస్థాన్ మాజీ ముఖ్యమంత్రి అశోక్ గెహ్లాట్ తీవ్ర దిగ్భ్రాంతి వ్యక్తం చేశారు. తమిళనాడు సీరవీ మహాసభ అధ్యక్షుడిగా, గొప్ప నిర్మాతగా ఆయన సేవలు చిరస్మరణీయమని, ఆయన కుటుంబానికి భగవంతుడు మనోధైర్యాన్ని ప్రసాదించాలని ఆకాంక్షించారు. నాలుగు దశాబ్దాల సుదీర్ఘ సినీ కెరీర్లో చౌదరి తెలుగు, తమిళ, మలయాళ, హిందీ భాషల్లో ఎన్నో అద్భుతమైన చిత్రాలను నిర్మించారు. ముఖ్యంగా సూర్యవంశం, గోకులం, నాట్టమై వంటి సూపర్ హిట్ చిత్రాలు ఆయనకు గొప్ప పేరు తెచ్చిపెట్టాయి. గతేడాది జూలైలో విడుదలైన 'మారీసన్' ఆయన నిర్మించిన చివరి చిత్రం. ప్రస్తుతం ఆయన భౌతిక కాయాన్ని అంత్యక్రియల నిమిత్తం చెన్నై తరలించేందుకు ఏర్పాట్లు జరుగుతున్నాయి. ఆయన మృతితో చిత్ర పరిశ్రమలో ఒక శకం ముగిసిందని సినీ ప్రముఖులు సంతాపం వ్యక్తం చేస్తున్నారు.
No comments:
Post a Comment