దీదీ ఆరోపణల్లో పస లేదు

  

• వీఎం ట్యాంపరింగ్, దాడి ఆరోపణలను కొట్టిపారేసిన ఎన్నికల అధికారి
• రాజ్యాంగమే సుప్రీం అంటూ స్పష్టీకరణ

పశ్చిమ బెంగాల్ ఎన్నికల్లో బీజేపీ ఘనవిజయం సాధించిన నేపథ్యంలో, ముఖ్యమంత్రి మమతా బెనర్జీ చేసిన తీవ్ర ఆరోపణలను రాష్ట్ర ప్రధాన ఎన్నికల అధికారి (CEO) మనోజ్ కుమార్ అగర్వాల్ గట్టిగా తిప్పికొట్టారు. ఈవీఎంలను ట్యాంపరింగ్ చేశారన్న ఆరోపణలపై స్పందిస్తూ.. స్పష్టమైన ఆధారాలు లేదా ఫిర్యాదులు లేకుండా గాలిలో చేసే ఆరోపణలపై తాము స్పందించలేమని ఆయన పేర్కొన్నారు. ఏ యంత్రాలు, ఏ టేబుల్ వద్ద, ఏ నియోజకవర్గంలో సమస్య ఉందో తెలియజేయకుండా విచారణ ఎలా సాధ్యమని ఆయన ప్రశ్నించారు. అలాగే, కౌంటింగ్ కేంద్రం వద్ద తనపై భౌతిక దాడి జరిగిందన్న మమతా బెనర్జీ మాటల్లో వాస్తవం లేదని, కౌంటింగ్ హాల్‌లోని సిసిటివి కెమెరాలు నిరంతరం పనిచేస్తూనే ఉన్నాయని, ఎక్కడా ఎవరూ ఎవరినీ కొట్టిన దాఖలాలు లేవని ఆయన స్పష్టం చేశారు. ఈ ఘటనపై సీఎం కానీ, ఆమె బృందం కానీ ఎటువంటి అధికారిక ఫిర్యాదు లేదా ఎఫ్ఐఆర్ నమోదు చేయకపోవడాన్ని ఆయన గుర్తు చేశారు.

మరోవైపు, ముఖ్యమంత్రి పదవికి రాజీనామా చేయనని, తాను ఓడిపోలేదంటూ మమతా బెనర్జీ చేస్తున్న మొండి పట్టుపై సీఈవో పరిపాలనాపరమైన వివరణ ఇచ్చారు. రాజీనామా అనేది ఆమెకు, గవర్నర్‌కు సంబంధించిన వ్యక్తిగత అంశమని, రాజ్యాంగం అందరికంటే అత్యున్నతమని ఆయన గుర్తు చేశారు. ఎన్నికల నిర్వహణలో సీఈవో పాత్ర పరిమితమని, కౌంటింగ్ ప్రక్రియ మొత్తం రిటర్నింగ్ అధికారుల పర్యవేక్షణలో సాగుతుందని వివరించారు. ఈ ప్రక్రియలో ఎటువంటి అవకతవకలకు తావులేదని, రాబోయే రీ-పోలింగ్ సమయంలో కూడా యంత్రాలపై టేపులు వేయడం లేదా ఇతర అంతరాయాలు కలగకుండా కట్టుదిట్టమైన చర్యలు తీసుకుంటున్నామని హామీ ఇచ్చారు.

అంతకుముందు మమతా బెనర్జీ మీడియా సమావేశంలో మాట్లాడుతూ.. ప్రధాన ఎన్నికల కమిషనర్ ఈ ఎన్నికలకు 'విలన్' అని, బీజేపీ మరియు ఎన్నికల సంఘం కుమ్మక్కై ప్రజాస్వామ్య హక్కులను దోచుకున్నారని మండిపడ్డారు. ఓటింగ్ ముగిసిన తర్వాత కూడా ఈవీఎంలలో 80-90 శాతం ఛార్జింగ్ ఉండటం ఎలా సాధ్యమని ఆమె ప్రశ్నించారు. ఐపీఎస్, ఐఏఎస్ అధికారులను మార్చడం ద్వారా బీజేపీ 'మురికి రాజకీయాలు' చేసిందని, తాము నైతికంగా విజయం సాధించామని ఆమె చెప్పుకొచ్చారు. బీజేపీ 207 స్థానాలతో పూర్తి మెజారిటీ సాధించి పీఠం ఎక్కేందుకు సిద్ధమవుతుండగా, 80 సీట్లకు పరిమితమైన మమతా బెనర్జీ మాత్రం పోరాటం కొనసాగిస్తానని, ఇండియా (INDIA) కూటమిని బలోపేతం చేస్తానని ప్రకటించారు.