ముఖ్యమంత్రి పీఠంపై ‘జైంట్ కిల్లర్’ సువేందు అధికారి!

• బెంగాల్ రాజకీయాల్లో నవశకం

పశ్చిమ బెంగాల్ రాజకీయాల్లో సంచలన మార్పుకు రంగం సిద్ధమైంది. తృణమూల్ కాంగ్రెస్ అధినేత్రి మమతా బెనర్జీని వరుసగా రెండోసారి ఓడించి ‘జైంట్ కిల్లర్’గా పేరుగాంచిన సువేందు అధికారి బెంగాల్ తదుపరి ముఖ్యమంత్రి కాబోతున్నట్లు సంకేతాలు వెలువడ్డాయి. ఇటీవల జరిగిన అసెంబ్లీ ఎన్నికల్లో బీజేపీ ఘనవిజయం సాధించడంతో, కొత్త ప్రభుత్వ ఏర్పాటుపై చర్చించేందుకు శుక్రవారం (మే 8) కోల్‌కతాలో బీజేపీ శాసనసభాపక్ష సమావేశం జరగనుంది. మొత్తం 207 మంది విజేత అభ్యర్థులకు సరిపోయేలా పార్టీ రాష్ట్ర కార్యాలయం వెలుపల ఒక పెద్ద వేదికను పార్టీ నాయకత్వం అన్వేషిస్తోంది. ఈ కీలక సమావేశంలో సువేందు అధికారిని శాసనసభాపక్ష నేతగా ఏకగ్రీవంగా ఎన్నుకోనున్నారు. రాష్ట్ర బీజేపీ అధ్యక్షుడు సమిక్ భట్టాచార్య ఆయన పేరును ప్రతిపాదించగా, కేంద్ర హోంమంత్రి అమిత్ షా అధికారికంగా ప్రకటన చేయనున్నారు. అనంతరం సువేందు అధికారి బృందం రాజ్‌భవన్‌కు వెళ్లి ప్రభుత్వాన్ని ఏర్పాటు చేసేందుకు అనుమతి కోరనుంది.

విశ్వకవి రవీంద్రనాథ్ ఠాగూర్ జయంతి (రవీంద్ర జయంతి) సందర్భంగా శనివారం (మే 9) ప్రమాణ స్వీకార కార్యక్రమం అట్టహాసంగా జరగనున్నది. ఈ చరిత్రాత్మక ఘట్టానికి ప్రధాని నరేంద్ర మోదీతో పాటు పలు రాష్ట్రాల ముఖ్యమంత్రులు, మిత్రపక్షాల నాయకులు హాజరుకానున్నారు. బెంగాల్ గడ్డపై పుట్టి, బెంగాలీ మాధ్యమంలో చదివి, ఆ భాషపై పట్టున్న వ్యక్తి మాత్రమే ముఖ్యమంత్రి అవుతారని గతంలో అమిత్ షా చెప్పినట్లుగా, సువేందు అన్ని అర్హతలను కలిగి ఉన్నారు. 2021లో నందిగ్రామ్‌లో మమతను ఓడించిన ఆయన, ఈసారి ఆమె సొంత నియోజకవర్గం భవానీపూర్‌లో భారీ మెజారిటీతో విజయం సాధించి పార్టీలో తిరుగులేని నాయకుడిగా ఎదిగారు. 2020లో టీఎంసీని వీడి బీజేపీలో చేరిన సువేందు, అప్పటి నుండి మమతా బెనర్జీ సర్కార్‌పై అవినీతి, చొరబాట్లు వంటి అంశాలపై రాజీలేని పోరాటం చేశారు. క్షేత్రస్థాయిలో బలమైన పట్టున్న నేతగా గుర్తింపు పొందిన సువేందు నాయకత్వంలో బెంగాల్‌ మొదటిసారి బీజేపీ పాలనలోకి అడుగుపెట్టబోతోంది.