వెనిజులా రాజధానిలో భారీ పేలుళ్లు

 

• అంధకారంలో కారకాస్ నగరం

కారకాస్: వెనిజులా రాజధాని కారకాస్‌లో శనివారం తెల్లవారుజామున వరుస పేలుళ్లు సంభవించాయి. ఈ భారీ పేలుళ్ల ధాటికి నగరం ఒక్కసారిగా ఉలిక్కిపడింది. స్థానిక కాలమానం ప్రకారం తెల్లవారుజామున 1:50 గంటల ప్రాంతంలో మొదటి పేలుడు సంభవించగా, ఆ తర్వాత వరుసగా మరికొన్ని పేలుళ్లు చోటుచేసుకున్నాయి.

విద్యుత్ సరఫరాకు అంతరాయం: ఈ పేలుళ్ల ప్రభావంతో నగరంలోని పలు ప్రాంతాల్లో విద్యుత్ సరఫరా నిలిచిపోయింది. ఒక్కసారిగా నగరం అంధకారంలోకి వెళ్లడంతో ప్రజలు తీవ్ర భయాందోళనలకు గురయ్యారు. పేలుళ్ల సమయంలో ఆకాశంలో మెరుపులు కనిపించాయని స్థానికులు సోషల్ మీడియా వేదికగా వెల్లడించారు.

కారణాలు అస్పష్టం: ఈ పేలుళ్లకు గల కారణాలు ఇంకా అధికారికంగా తెలియరాలేదు. ఇవి సైనిక చర్యలా లేక ఏదైనా బాహ్య ప్రమేయం ఉందా అనే దానిపై వెనిజులా ప్రభుత్వం ఇంకా స్పష్టత ఇవ్వలేదు. అమెరికా, వెనిజులా మధ్య ఉద్రిక్తతలు పెరుగుతున్న తరుణంలో ఈ ఘటన జరగడం గమనార్హం. వెనిజులా అధ్యక్షుడు నికోలస్ మదురో ప్రభుత్వంపై అమెరికా ఆంక్షలు విధించడం, డ్రగ్స్ స్మగ్లింగ్ ఆరోపణలు చేయడం వంటి అంశాలతో ఇరు దేశాల మధ్య విభేదాలు కొనసాగుతున్నాయి.కొలంబియా మాజీ అధ్యక్షుడు గుస్తావో పెట్రో ఈ ఘటనపై స్పందిస్తూ, వెనిజులాపై జరుగుతున్న దాడుల గురించి చర్చించేందుకు ఐక్యరాజ్యసమితి భద్రతా మండలిని వెంటనే సమావేశపరచాలని కోరారు.