తమిళనాట విజయ్ రాజకీయ చదరంగం

• గవర్నర్‌తో భేటీకి సిద్ధమైన టీవీకే అధినేత
• మెజారిటీ కోసం విజయ్ ముందున్న రెండు ప్రధాన మార్గాలు

తమిళనాడు అసెంబ్లీ ఎన్నికల్లో డీఎంకే, ఏఐఏడీఎంకే వంటి దిగ్గజ పార్టీలను వెనక్కి నెట్టి 108 సీట్లు సాధించిన నటుడు విజయ్, ఇప్పుడు పీఠాన్ని దక్కించుకునేందుకు వ్యూహాలకు పదును పెడుతున్నారు. పార్టీ ఎమ్మెల్యేలందరూ ఆయనను శాసనసభాపక్ష నేతగా ఏకగ్రీవంగా ఎన్నుకోవడంతో, ఆయన త్వరలోనే గవర్నర్‌ను కలిసి ప్రభుత్వాన్ని ఏర్పాటు చేసేందుకు అవకాశం ఇవ్వాలని కోరనున్నారు. అయితే, ప్రభుత్వ ఏర్పాటుకు అవసరమైన 118 సీట్లు టీవీకేకు లేకపోవడంతో, విజయ్ ముందు ఇప్పుడు రెండు ప్రధాన అవకాశాలు కనిపిస్తున్నాయి. మొదటిది, డీఎంకే కూటమిలో ఉన్న చిన్న పార్టీల మద్దతు కూడగట్టడం. ఇప్పటికే కాంగ్రెస్ (5 సీట్లు) విజయ్‌కు మద్దతు ఇచ్చేందుకు సుముఖత వ్యక్తం చేయగా, సీపీఐ, సీపీఎం, వీసీకే (VCK) వంటి పార్టీలు కూడా టీవీకే వైపు మొగ్గు చూపే అవకాశం ఉంది. ఈ పార్టీలన్నీ కలిస్తే విజయ్ సునాయాసంగా మ్యాజిక్ ఫిగర్‌ను దాటవచ్చు.

రెండో మార్గం ఏమిటంటే, ప్రధాన ప్రతిపక్షంగా నిలిచిన ఏఐఏడీఎంకే (AIADMK) నుంచి బయటి నుంచి మద్దతు పొందడం. డీఎంకేను అధికారానికి దూరం చేయడమే లక్ష్యంగా అన్నాడీఎంకే ఈ నిర్ణయం తీసుకునే అవకాశం ఉందని కొందరు విశ్లేషిస్తున్నారు. అయితే, విజయ్ ఇప్పటికే బీజేపీని తన 'సిద్ధాంత శత్రువు'గా ప్రకటించిన నేపథ్యంలో, బీజేపీతో పొత్తులో ఉన్న అన్నాడీఎంకే మద్దతు తీసుకోవడం కొంత సంక్లిష్టంగా మారవచ్చు. ఒకవేళ అన్నాడీఎంకే మద్దతు ఇవ్వాలంటే ఆ పార్టీ ఎన్డీయే కూటమి నుండి బయటకు రావాల్సి ఉంటుంది. ఈ నేపథ్యంలో విజయ్ కేవలం సెక్యులర్ పార్టీలైన కాంగ్రెస్ , లెఫ్ట్ పార్టీల సహాయంతోనే ముందుకెళ్లేందుకే ఎక్కువ మొగ్గు చూపుతున్నట్లు తెలుస్తోంది.

మరోవైపు, విజయ్ రెండు చోట్ల (పెరంబూర్, తిరుచ్చి ఈస్ట్) విజయం సాధించడంతో, ఒక స్థానానికి రాజీనామా చేయాల్సి ఉంటుంది. ఫలితంగా అసెంబ్లీలో మెజారిటీ మార్కు 117కి తగ్గే అవకాశం ఉంది. తాజా సమాచారం ప్రకారం, మే 7వ తేదీన విజయ్ ముఖ్యమంత్రిగా ప్రమాణ స్వీకారం చేసే అవకాశం ఉందని ఆయన సన్నిహిత వర్గాలు పేర్కొంటున్నాయి. దశాబ్దాలుగా సాగుతున్న ద్రవిడ పార్టీల ఆధిపత్యానికి తెరదించి, ఒక కొత్త రాజకీయ శకానికి విజయ్ నాంది పలుకుతారా అనేది ఇప్పుడు యావత్ దేశం ఆసక్తిగా గమనిస్తోంది.