రేపే విజయ్ ప్రమాణ స్వీకారం?

• గవర్నర్ నిర్ణయంపైనే సర్వత్రా ఆసక్తి!

తమిళనాడు అసెంబ్లీ ఎన్నికల్లో అనూహ్య విజయం సాధించిన తమిళ వెట్రి కళగం (TVK) పీఠాన్ని దక్కించుకునేందుకు ముమ్మర ప్రయత్నాలు చేస్తోంది. అయితే, రేపు (మే 7) ముఖ్యమంత్రిగా విజయ్ ప్రమాణ స్వీకారం చేసే అవకాశం లేదని తాజాగా రాజకీయ వర్గాల నుంచి అందుతున్న సమాచారం. 234 స్థానాలు ఉన్న అసెంబ్లీలో మెజారిటీ మార్కు 118 కాగా, విజయ్ నేతృత్వంలోని టీవీకే ప్రస్తుతం 108 స్థానాలను కైవసం చేసుకుంది. మ్యాజిక్ ఫిగర్‌కు మరో 10 స్థానాల దూరంలో నిలవడంతో, స్పష్టమైన మెజారిటీని నిరూపించుకోవడంలో సాంకేతిక ఇబ్బందులు ఎదురవుతున్నాయి. కాంగ్రెస్ తన 5 మంది ఎమ్మెల్యేల మద్దతును విజయ్‌కు ప్రకటించినప్పటికీ, కూటమి బలం 113కు మాత్రమే చేరుకుంది. ప్రభుత్వం ఏర్పాటు చేయడానికి మరో 5 మంది సభ్యుల మద్దతును అధికారికంగా గవర్నర్‌కు చూపించాల్సి ఉంది. ప్రస్తుతం విజయ్ తన బలాన్ని నిరూపించుకునేందుకు ఇతర చిన్న పార్టీలు , స్వతంత్ర అభ్యర్థులతో సంప్రదింపులు జరుపుతున్నారు. గవర్నర్ రాజేంద్ర విశ్వనాథ్ అర్లేకర్ మెజారిటీ విషయంలో పక్కా ఆధారాలు కోరుతుండటంతో, స్పష్టమైన సంఖ్యా బలం చేకూరే వరకు ప్రమాణ స్వీకార కార్యక్రమాన్ని వాయిదా వేయాలని భావిస్తున్నట్లు తెలుస్తోంది. ఇప్పటికే చెన్నైలోని జవహర్‌లాల్ నెహ్రూ ఇండోర్ స్టేడియంలో ప్రమాణ స్వీకారానికి ఏర్పాట్లు జరుగుతున్నాయని ప్రచారం జరిగినప్పటికీ, తాజా పరిణామాల నేపథ్యంలో ఈ కార్యక్రమం మే 8 లేదా 9వ తేదీకి మారే అవకాశం ఉంది. మెజారిటీ నిరూపణపై అధికారిక ప్రకటన వెలువడే వరకు తమిళ రాజకీయాల్లో ఈ సస్పెన్స్ కొనసాగేలా కనిపిస్తోంది.